Nagpahayag ng ganap na kahandaan ang Department of the Interior and Local Government kasama ng Philippine National Police para siguruhin ang ligtas at maayos na pagsasagawa ng Trillion Peso March, bukas, Nobiyembre 30.
Pinagtibay ng ahensya ang kanilang commitment na protektahan ang bawat mamamayan, panatilihin ang kaayusan at tiyaking magiging ligtas ang malawakang rally.
Sa isang statement kaugnay sa security preparations ng DILG, sinabi nitong magdedeploy ang pambansang pulisya ng sapat na kapulisan sa mga kritikal na lugar para mapangasiwaan ang dami ng mga tao, marespondehan ang mga emergency situation at manatili ang daloy ng trapiko.
Mahigpit ding oobserbahan ang maximum tolerance at para matiyak ang kaligtasan ng publiko, sinuspendi na ang permit sa pagbitbit ng mga baril sa Metro Manila simula ngayong Sabado hanggang sa Lunes, kung saan tanging law enforcement personnel na gumagampan ng kanilang official duties ang papayagang magdala ng baril sa naturang period.
Ito ay alinsunod na rin sa direktiba ni Pangulong Ferdinand Marcos Jr. para masiguro ang kaligtasan ng publiko habang ipinapairal ang constitutional right ng mga Pilipino para sa pagdaraos ng mapayapang pagtitipon.
Hinimok naman ng DILG ang lahat ng mga makikibahagi sa rally na ipahayag ng kanilang karapatan nang responsable, sundin ang mga panuntunan mula sa mga awtoridad at makiisa para sa maayos at ligtas na rally.
