Sinimulan na ng Department of Agriculture (DA) ang implementasyon ng mga proyektong pinondohan ng World Bank na karamihan ay layunin na mapagbuti ang local agriculture infrastructure sa bansa.
Ayon sa DA ang mga proyektong ito ay nagkakahalaga ng $920 million na kinabibilangan ng Philippine Rural Development Project (PRDP) Scale-Up na mayroong inilaang pondo na $600 million, Mindanao Inclusive Agriculture Development Project (MIADP)-$120 million, at Philippine Fisheries and Coastal Resiliency (FishCoRe) Project ( $200 million).
Ang Philippine Rural Development Project (PRDP) Scale-Up ay layuning tulungan ang mga magsasaka at mangingisda na mapataas ang kanilang produksiyon at mapalakas ang partisipasyon ng mga kababaihan sa agrikultura.
Ipapatupad ito sa lahat ng 82 probinsiya sa buong PH.
Samantala, ang FishCore naman ay layunin mapalakas ang fishery resources management partikular sa 24 na probinsiya at 11 rehiyon sa bansa habang ipapatupad din ang agri-fishery-based economic activities para sa mga katutubong indibidwal sa Mindanao sa ilalim ng Mindanao Inclusive Agriculture Development Project
Sinabi naman ng World Bank na layunin ng 3 proyekto na ito ay para mapabuti ang seguridad ng pagkain sa bansa sa pamamagitan ng pamumuhunan sa mahahalagang imprastruktura.
