Muli na namang nagpakitang gilas ang Philippine Accessible Disability Services Inc. (PADS) dragon boat team ng Cebu matapos makasungkit ng mga medalya sa Nevada International Dragon Boat Festival 2023 nitong Oktubre 14-15 sa Las Vegas Nevada, USA.
Nasungkit ng koponan ang mga gintong medalya sa 200m corporate division A, 500m competitive division at 500m open grand masters.
Habang silver medal naman ang nakuha matapos pumangalawang pwesto sa 200m competitive division.
Sa panayam ng Star Fm Cebu, ipinagmalaki at ikinatuwa ng team manager ng PADS dragon boat team na si John Paul Maunes ang resulta ng nasabing kompetisyon.
Nagpapakita lamang umano ito na ang sports ay walang hangganan at ito’y para sa lahat.
Ibinunyag naman ni Maunes na karamihan sa mga nakalaban ng Cebuano paddlers ay mga club team mula sa USA.
Target naman ng koponan ang next World championships sa susunod na taon na gaganapin sa Ravenna, Italy.
Kung maaalala na bago ang nasabing kompetisyon, napanalunan din ng koponan ang gintong medalya sa 16th IDBF World Dragon Boat Racing Championships sa bansang Thailand.
