Nasawi ang nasa 21 katao habang mahigit 100 katao ang napaulat na nasugatan matapos magbanggaan ang dalawang high-speed trains sa southern Spain.
Ayon sa mga awtoridad, posibleng tumaas pa ang death toll habang nagpapatuloy ang paghahanap ng rescuers sa wreckage at pagtunton sa mga survivor.
Iniulat ni Spain transport minister Oscar Puente na mahigit 30 katao ang kasalukuyang ginagamot sa ospital matapos magtamo ng seryosong injuries.
Nangyari ang insidente malapit sa Adamuz town, malapit sa city ng Cordoba, nang madiskaril ang isang high-speed train na galling ng Malaga at patungo sana noon sa Madrid. Napunta ito sa kabilang direksiyon saka bumangga sa paparating na isa pang high-speed train, na bumibiyahe naman noon mula Madrid patungong Huelva.
Base sa Iryo, isang private rail company na nag-ooperate ng biyahe mula sa Malaga, nasa 300 pasahero ang sakay ng tren na nadiskaril habang ang isa namang tren ay may lulang 100 pasahero.
Hamon ngayon sa mga rescuer sa pagrekober sa mga survivor at mga labi ang pagbaliktad ng napinsalang tren.
Kasunod naman ng aksidente, sinuspendi ang lahat ng rail services sa pagitan ng Madrid at Andalusia.
Nagpadala naman na ng Spanish Red Cross ng emergency support services sa pinangyarihan ng aksidente kalakip ng pagbibigay ng counselling sa mga pamilya ng mga biktima.
Nakasubaybay naman ngayon sina King Felipe Vi at Queen Letizia kaugnay sa development sa trahediya at nagpaabot ng pakikiramay sa mga kamag-anak at mahal sa buhay ng mga nasawi at para sa mabilis na paggaling ng mga nasugatan sa insidente.
Sa ngayon, hindi pa matukoy ang sanhi ng pagkadiskaril ng naturang high-speed train.
