Kinumpirma ni Senador Jinggoy Estrada na ang kanyang anak at pamangkin ay binugbog ng tatlong lalaki na lokal na mga residente ng Boracay madaling araw kahapon, ika-24 ng Mayo, taong kasalukuyan.
Batay sa salaysay ng mga biktima, pauwi na galing sa isang bar ang dalawang nang atakihin sila ng mga suspek mula sa likuran. Kwento ni Estrada, sinabi umano ng isa sa mga sumalakay sa kanyang pamangkin na “masyado kang maangas.”
Ayon pa sa senador, walang nangyaring komprontasyon sa pagitan ng mga biktima at suspek sa loob ng bar, at makukumpirma ito sa CCTV footage na kanilang nakalap mula sa pinangyarihan ng insidente.
Nagtamo ng suntok sa ulo ang anak ni Estrada at nabali ang kuko sa paa matapos siyang paulit-ulit na sipain at pagkatapos ay tsaka bumagsak habang nagkaroon naman ng pinsala sa ilong ang kanyang pamangkin na kasalukuyan nang nagpapagaling sa isang ospital.
Samantala, ayon sa Senador, agad siyang lumipad at nagtungo sa Boracay kahapon upang magsampa ng kaso laban sa mga sangkot na indibidwal.
