Inilunsad ng Department of Energy (DOE), sa pamamagitan ni Undersecretary Maria Francesca Del Rosario, ang DOE WataWATT Automation Project para maging mas mabilis, madali, at maayos ang mga serbisyo ng gobyerno gamit ang makabagong teknolohiya.
Magdadala ang proyekto ng isang awtomatikong sistema na ginagamitan ng artificial intelligence (AI). Magsisimula ito sa pagpapaganda ng Energy Virtual One-Stop Shop (EVOSS) bago tuluyang isama ang 12 pang sistema ng DOE.
Ilan sa mga tampok nito ang awtomatikong proseso ng trabaho, pagsusuri ng mga dokumento gamit ang AI, digital na pag-apruba, at pag-iipon ng mga impormasyon sa isang lugar para mas mapabilis ang mga transaksyon at maiwasan ang pagtatagal.
Sa pamamagitan ng proyektong ito, nais ng ahensya na maging mas tapat, malinaw, at may pananagutan sa mga transaksiyon sa gobyerno. Layunin din nitong mabigyan ang mga nasa sektor ng enerhiya at ang publiko ng mas maaasahang serbisyo.
Malaking hakbang ito para mapaganda ang sistema ng mga transaksyon sa enerhiya. Suporta rin ito sa mas malawak na layunin ng bansa para sa digital na pamamahala at paglago ng ekonomiya.
