Suportado umano ng mayorya ng Senado ang pagsisikap ni Senate Finance Committee Chairperson JV Ejercito na alisin sa panukalang 2027 national budget ang mga kuwestiyonable at posibleng pagmulan ng korupsiyon na alokasyon, ayon kay Sen. Panfilo “Ping” Lacson.
Sa pahayag ni Lacson, sinabi niyang nagkakaisa ang mga senador sa pagsusuri sa panukalang badyet upang matiyak na maalis ang mga alokasyong wala umanong sapat na batayan at maaaring magamit sa katiwalian.
Ayon kay Lacson, hindi lamang ang pagtanggal sa mga kuwestiyonableng alokasyon ang layunin ng pagsusuri kundi ang pagtitiyak din ng transparency sa buong proseso ng pagbuo ng pambansang badyet.
Binigyang-diin niya na walang dapat maging eksepsiyon sa pagsusuri sa mga gastusin ng pamahalaan.
“All means all,” giit ng senador, na nagpapahiwatig na lahat ng kahina-hinalang alokasyon ay dapat masuri anuman ang pinagmulan o kung sino ang posibleng makinabang dito.
Nauna na ring sinabi ni Lacson na walang dapat palampasin ang Senado sa pagwawasto sa mga kuwestiyonableng alokasyon sa bersiyon ng panukalang badyet na ipinasa ng Kamara de Representantes, kabilang ang mga proyektong maaaring maiugnay sa mga taong malapit sa Pangulo.
Bagama’t wala siyang nalalamang miyembro ng mayorya ang nagpasok ng kani-kanilang proyektong pinapaboran sa panukalang badyet, sinabi ni Lacson na nararamdaman niya ang pagkakaisa ng kaniyang mga kasamahan batay sa kanilang mga pag-uusap.
Sa gitna ng pagsusuri sa 2027 budget, inaasahang magiging mahalagang usapin sa Senado ang pagtukoy at pagtanggal sa mga alokasyong walang sapat na katwiran, kasabay ng pagsusulong ng mas bukas at malinaw na proseso ng paglalaan ng pondo ng bayan.
