Kinuwestiyon ni senator-judge Joel Villanueva kung paano nakapagtala ng mahigit P150 milyon na sales noong 2024 ang Cale88 Foods Corp., isang banana chips exporter na iniuugnay sa business interests ni Manases Carpio, asawa ni Vice President Sara Duterte, gayong wala itong idineklarang empleyado sa General Information Sheet nito sa naturang taon.
Sa impeachment trial nitong Biyernes, Oktubre 9, binanggit ni Villanueva ang P150.76 milyong sales at P6.13 milyong pagkalugi ng kumpanya noong 2024. Ayon sa BIR witness na si ATTY Anne Lorraine Garcia-Marquez, nakasaad sa financial statements nito ang gastos sa direct labor at sahod, ngunit walang detalye sa bilang ng mga manggagawa o kontratista.
Kinuwestiyon din ng senador ang mga dokumentong sumusuporta sa foreign transactions ng kumpanya, kabilang ang sales invoices, shipping records at logistics costs. Sinabi ni Garcia-Marquez na mayroon siyang audited financial statements at income tax return, ngunit wala ang mga kaugnay na invoice at iba pang supporting documents.
Nauna nang lumitaw sa AMLC report na nakatanggap ang Cale88 ng kabuuang P319.2 milyong inward remittances mula China mula 2022 hanggang 2025. Nang tanungin kung paano natustusan ang operasyon sa kabila ng pagkalugi, sinabi ng BIR witness na nakasaad sa financial statements ang pangakong patuloy na suportang pinansyal mula sa management o mga may-ari.
Binigyang-diin ni Villanueva na nais niyang malaman kung may sapat na manggagawa, supplier at aktuwal na produksyon na susuporta sa iniulat na sales at foreign transactions. Nilinaw niyang hindi niya pa konklusyong fictitious ang operasyon, ngunit aniya, nakababahala ang mga impormasyong lumitaw.
