Nagbigay ng tulong pinansyal ang tanggapan ni Speaker Ferdinand Martin G. Romualdez sa dalawang Pilipinong atleta na kakatawan sa bansa sa Paris Olympics.
Si Head Executive Assistant of the Office of the Speaker, Director V Atty. Lemuel “Muel” Romero, ang nag-abot ng cash assistance kina Levi Jung-Ruivivar at Carlos Edriel Yulo, kapwa gymnasts, sa isang simpleng seremonya sa Kamara de Representantes.
“Every one of our athletes has shown remarkable dedication, resilience, and excellence, representing the Philippines on the world stage with immense pride and honor,” ani Speaker Romualdez sa kanyang mensahe sa mga atleta.
Matatandaan na noong Mayo 22, bumisita kay Speaker Romualdez ang delegasyon ng mga atletang Pilipino na lalaban sa Paris sa pangunguna ni Samahang Weightlifting ng Pilipinas President Monico Puentevella.
Binigyan din ng tanggapan ni Speaker Romualdez ng tulong pinansyal ang mga atletang lalaban sa Olympics kasama ang mga weightlifter na sina John Ceniza, Eireen Ando, at Vanessa Sarno, at ang rower na si Joanie Delgaco.
Ipinaabot ni Speaker Romualdez ang paghanga sa mga atleta na nagsusumikap at nagsisilbing inspirasyon sa marami.
“This financial support is more than a reward; it is a symbol of our belief in your abilities and our commitment to your success. Your victories inspire hope and pride in every Filipino, and you exemplify the power of passion and perseverance,” dagdag pa nito.
Ayon sa lider ng Kamara na mayroong mahigit 300 kinatawan, ang mga atletang Pilipino na lalahok sa Paris Olympics ay nagpapakita ng talento at competitive spirit ng mga Pinoy sa pandaigdigang larangan.
