Nanawagan muli si Senador Loren Legarda sa pamahalaan na suspendihin na ang excise tax at value-added tax (VAT) sa diesel at gasolina upang maibsan ang patuloy na pagtaas ng presyo ng mga pangunahing bilihin sa bansa.
Ayon kay Legarda, hindi pa rin nararamdaman ng maraming Pilipino ang epekto ng mga hakbang ng gobyerno, sa kabila ng naunang anunsyo na pagsuspinde ng excise tax sa LPG at kerosene at pagtalakay sa posibleng suspensyon ng buwis sa diesel at gasolina.
Giit ng senador, mas direktang makakatulong sa mga tsuper, mangingisda, magsasaka, at ordinaryong pamilya ang pagbabawas ng buwis sa fuel dahil ito ay agad na makakaapekto sa presyo ng transportasyon at pagkain.
Ipinakita rin niya ang estimate na kung aalisin ang buwis, maaaring bumaba ang presyo ng diesel at gasolina ng malaking halaga kada litro, na aniya ay agad mararamdaman ng publiko.
Tinanggihan din ni Legarda ang argumento na ang fuel tax cut ay para lamang sa mayayaman, at binigyang-diin na ang pagtaas ng gasolina ay may domino effect sa buong ekonomiya ng bansa, lalo na sa mahihirap na sektor.
Dagdag pa niya, mas epektibo raw ang direktang pagbabawas ng buwis kaysa sa targeted aid programs dahil sa mabagal na proseso ng ayuda at posibleng pagdaan pa nito sa mas maraming bureau.
Sinabi rin ng senador na may pondo ang gobyerno para rito sa pamamagitan ng pagbabawas ng mga hindi kailangang gastusin, pag-freeze ng hiring sa non-essential positions, at paglipat sa digital systems upang makatipid.
