Tiniyak ng Philippine Statistics Authority (PSA)sa publiko na magiging transparent at proactive ito sa gitna ng naiulat na data breach sa kanilang sistema.
Iniimbestigahan na ng mga ahensya ng gobyerno at cybercrime units kung paano na-hack ang kanilang Community-Based Monitoring System (CMBS).
Ayon sa PSA, ang nasabing sistema ay ginagamit bilang batayan para sa mga programa sa pagsugpo sa kahirapan.
Batay sa pagsisiyasat, ang mga link na nai-post ng mga hackers ay humantong sa limitadong data na kinuha mula sa Community-Based Monitoring System Management Information System.
Ang pinaigting na mga protocol ng seguridad ay itinatag na upang hadlangan ang anumang karagdagang pag-atake sa lahat ng iba pang mga sistemang pinamamahalaan ng PSA.
Binanggit ng ahensya na ang datos sa Philippine Identification System (PhilSys), Civil Registry System, at mahigit isandaang census at survey na isinasagawa ng ahensya ay hindi naman naaapektuhan.
Sinabi rin nito na agad nitong in-activate ang Data Breach Response Team ng ahensya nang matuklasan nila ang data breach.
Una nang sinabi ni Information and Communications Technology Undersecretary Jeffrey Ian Dy na ang paghack sa PSA ay hindi gaya ng pag-atake ng Medusa ransomware sa mga sistema ng state insurer na PhilHealth noong huling bahagi ng Setyembre.
