Isinalang na sa plenaryo ng Kamara ang House Bill No. 7240 o panukalang National Government Rightsizing Program.
Sa sponsorship speech ni Bukidnon 2nd district Rep. Jonathan Keith Flores, binigyang diin nito ang National Government Rightsizing Program ay isang reform mechanism upang mapabuti ang institutional capacity ng pamahalaan sa pagpapaabot ng serbisyo sa publiko.
Sasakupin ng NGRP ang lahat ng ahensya ng Executive Branch kasama ang departments, bureaus, offices, commissions, boards, councils at government-owned and -controlled corporations.
Ang Lehislatura, Judiciary at Constitutional Commissions, Commission on Human Rights at Office of the Ombudsman ay maaari rin magpatupad ng rightsizing salig sa guidelines ng batas at ng Unified Position Classification and Compensation System.
Nilinaw din sa nasabing panukala na hindi kasama sa rightsizing ang teaching o teaching related positions; medical at allied medical positions at military o uniformed personnel.
Sa naturang panukala, bibigyang kapangyarihan ang Pangulo ng Pilipinas na gumawa ng pagbabago sa organizational structure ng mga ahensya sa pamamagitan ng itatatag na Committee on Rightsizing na ang mga miyembro ay binubuo ng Executive Secretary bilang Chair, kasama ang mga kalihim ng DBM, NEDA, Chair ng Civil Service Commission at Director General ng ARTA.
Magkakaroon din ng Joint Congressional Oversight Committee na siyang magbabantay at mage-evaluate sa tamang implementasyon ng NGRP.
Ang mga empleyadong maaapektuhan ng NGRP ay bibigyan ng retirement benefits, separation incentives at retooling para sa posibleng reappointment o reemployment.
Isa ang Rightsizing Program sa priority measures ng Marcos Jr. administration.
