CAGAYAN DE ORO CITY – Nahuli ng mga pulis ang mag live-in partner sa isinagawang buy-bust operation sa coastal road Barangay Lapasan, Cagayan de Oro City.
Kinilala ang mga nahuli na sina Junel Pabricante, 30 at Reselyn Gonzaga, 32 na taga Seaside Lapas 1 sa naturang barangay.
Sinabi ni Agora Police Station Commander Police Major Julius Clark Macariola na gamit ang P4,000 nilang buy bust money, kanilang nabilhan ang mga suspek ng isang sachet ng pinaniniwalaang shabu.
Nang isinagawa ang body search, isa pang malaking sachet ang nakuha sa posisyon nito.
Umabot sa 100 gramong droga ang nakuha sa mag live-in partner na tinatayang nasa kalahating milyong piso ang market value.
Sa ngayon ay nakakulong na ang dalawa habang inihahanda ang kaso na isasampa laban sa kanila.
