Nanawagan ang grupong Marcos Resign Movement na sumailalim si Pangulong Ferdinand Marcos Jr. sa hair follicle test upang tuldukan umano ang mga isyung umiikot kaugnay sa kanya.
Sa isang panayam ng Bombo Radyo Philippines, sinabi ni Ret. Gen. Warlito Daos, dating chief of staff for public safety ng Department of the Interior and Local Government (DILG), na ito ang nakikita niyang paraan para malinawan ang publiko sa mga ibinabato umanong alegasyon laban sa Pangulo.
‘Isa lang ang makakapanghinto. And I’m demanding kasi nga binoto natin siya. Empleyado natin siya, employer tayo. Kaya bilang empleyado na, I’m demanding him para matapos na ’to — na magpa–hair follicle test siya,’ pahayag ni Daos.
Giit pa niya, magiging daan umano ito upang mawakasan ang aniya’y kaguluhan at kontrobersiyang kinahaharap ng Pangulo.
‘Mamatay lahat ng issue against sa kanya kapag napatunayan niyang hindi siya drug addict,’ ani Daos.
Binanggit pa ng retiradong heneral ang umano’y pahayag ni Sen. Imee Marcos, na handa umanong tumulong sa Pangulo at bumaba sa Senado kung kinakailangan para maisaayos ang sitwasyon.
Dagdag pa niya, handa raw silang mamuhay na lamang sa Ilocos Norte kung kinakailangang sumailalim ang Pangulo sa gamutan.
‘Sinabi na nga ng kapatid niya [Sen. Imee Marcos], a seating Senator. Sasamahan na siya willing din siyang bumaba sa puwesto sa pagka Senador, mamuhay na lang sila sa Ilocos Norte. Mapagamot lang siya [PBBM],’ wika pa ng dating Heneral.
Ipinahayag pa ng grupo ang panawagan kasabay ng Trillion Peso March na isinagawa nitong Linggo, Nobyembre 30, 2025, sa EDSA People Power Monument bilang protesta laban sa katiwalian.
Bahagi rito ang hiwalay na pagtitipon ng grupo sa EDSA Shrine kung saan muling inungkat ang isyu ng pagkakasangkot umano ng Pangulo sa katiwalian matapos isiwalat ni dating Ako Bicol Party-List Representative Elizaldy ”Zaldy” Co na napunta lahat ng P100 billion budget insertions sa Pangulo at kay dating House Speaker Martin Romualdez.
