KALIBO, Aklan — Dinepensahan ng Makabayan Bloc ang kanilang panawagan na sabayang pagbibitiw nina Pangulong Ferdinand Marcos Jr., at Vice President Sara Duterte dahil sa malawakang isyu ng korapsyon sa gobyerno.
Sa panayam ng Bombo Radyo Kalibo, sinabi ni Kabataan Party-list Rep. Renee Co naaayon sa Konstitusyon ang pagbuo ng People’s Transition council kapalit ng pag-resign sa pwesto ng Pangulo at ikalawang pangulo.
Maari umanong pansamantalang umupo bilang Presidente ang Senate President o ang House Speaker habang wala pang idaraos na special elections.
Samantala, sinabi pa ni Co na siguradong marami ang madidismaya sakaling lumabas sa imbestigasyon na may kinalaman si Pangulong Marcos Jr., sa nabulgar na maanomaliyang flood control projects sa bansa.
Matatandaang ang Pangulo mismo ang nag-utos na imbestigahan ang naturang anomalya matapos na matukoy na 20% ng flood control projects ng pamahalaan ay nai-award sa 15 contractors lamang.
Nabatid na nagtungo ang grupo sa tanggapan ng Independent Commission for Infrastructure, araw ng Miyerkules upang pormal na hilingin na imbestigahan ang mga exposé ni dating Ako Bicol Party-list Rep. Zaldy Co na mistulang may corroboration sa mga alegasyon ni dating DPWH Undersecretary Roberto Bernardo kaugnay sa diumano’y P100 bilyon insertion at kickback sa 2025 national budget na sinasabing may “go signal” ng Pangulo.
