Pormal nang tinapos ng House prosecution nitong Biyernes ang paglalahad ng mga ebidensiya sa impeachment trial ni Vice President Sara Duterte, at iginiit na maaaring magpatibay sa kasong impeachment ang mga dokumentong iniharap laban sa kanya.
Ayon kay House prosecution spokesperson Ace Barbers, tinatayang P817.87 milyon ang umano’y hindi naideklarang yaman at kita nina Duterte at asawang si Atty. Manases Carpio mula 2022 hanggang 2025, batay sa pagsusuri ng financial expert na si Alexander Cabrera.
Sinuri ni Cabrera ang mga rekord ng bangko, Statement of Assets, Liabilities and Net Worth (SALN), at mga dokumento ng mga kumpanyang may kaugnayan sa mag-asawa.
Iginiit naman ni House prosecutor Zia Alonto Adiong na maaaring magpahiwatig ng pagtatago ng mga ari-arian ang ilang transaksiyong pinuna ng eksperto.
Gayunman, ang mga alegasyon at resulta ng pagsusuri ay kailangan pang timbangin ng Senado bilang impeachment court. Hindi pa rin naihaharap ng depensa ang panig at mga ebidensiya nito.
