CENTRAL MINDANAO-Binawian ng buhay ang isang fish vendor at sugatan ang kanyang kasama sa pamamaril dakong alas 6:05 ng umaga nitong araw ng Miyerkules sa probinsya ng Cotabato.
Nakilala ang nasawi na si Anggoy Namla at sugatan ang kanyang kasama na si Datuali Salik mga residente ng Pikit Cotabato.
Ayon sa ulat ng Aleosan PNP na naglalako umano ng isdang paninda ang mga biktima lulan ng motorsiklo ngunit pagsapit nila sa Purok Langka Barangay New Leon Aleosan Cotabato ay bigla silang pinagbabaril ng mga hindi kilalang suspek gamit ang kalibre.45 na pistola.
Mabilis namang tumakas ang mga salarin na sakay rin ng motorsiklo na walang plaka.
Patay on the spot si Namla nang magtamo ng maraming tama ng bala sa ibat-ibang parte ng kanyang katawan habang naisugod sa Aleosan District Hospital ang kanyang kasama.
Sa ngayon ay blangko pa ang Aleosan PNP sa motibo sa pamamaril sa mga biktima at patuloy pa silang nag-iimbestiga.
