-- Advertisements --
Mahigpit na binalaan ng Department of Energy ang mga kumpanya ng langis laban sa pagpapatupad ng “pautay-utay” o staggered na malakihang rollback na magsisimula bukas, Nobyembre 10.
Ayon sa pamunuan ng ahensya, posibleng maharap sa kaukulang show-cause order at masusing inspeksyon ang sinumang kumpanya na hindi susunod sa naturang direktiba.
Kaugnay ito ng malaking bawas-presyo sa mga produktong petrolyo kung saan aabot sa P16.80 bawat litro ang bawas sa gasolina, P4.10 sa diesel, at P3.70 sa kerosene.
Paliwanag ng DOE, ang malaking tapyas-presyo ay direktang bunsod ng pagbagsak ng halaga ng langis sa international market dahil sa pagluwag ng tensyon sa pagitan ng Estados Unidos at Iran.
Mariing iginiit ni DOE Undersecretary Alessandro Sales na hindi pinapayagan ang pautay-utay na reduction dahil mandated o utos ito ng ahensya habang umiiral pa rin ang state of calamity dahil sa patuloy pa rin ng tensyon sa Middle East.
Ayon pa sa opisyal, kadalasang nangyayari ang pautay-utay na sistema sa tuwing tumataas ang presyo ng gasolina at hindi sa mga panahong may malaking pagbaba o reduction nito.
Tiniyak din niya na bukas at transparent ang komputasyon ng ahensya sa kabila ng pagkuwestiyon ng ilang oil firms, at iginiit na hindi kailanman nagbago ang kanilang basehan sa pagkuwenta.
