Nagpaabot ng espesyal na pagbati ang aktor at direktor na si Coco Martin sa kanyang kasintahan na si Julia Montes sa ika-31 niyang kaarawan.
Sa kanyang Instagram post noong Huwebes, Marso 19, pinasalamatan ni Coco si Julia sa kanyang pagmamahal at pag-aalaga sa kanya at sa kanilang “pamilya.”
Kasama sa post ang litrato nila na nagpapakita ng duck face. Ayon pa sa post ni Coco: “Maligayang Kaarawan po sa pinakamamahal ko, Mara! Maraming salamat sa walang sawang pagmamahal at pag-aalaga mo sakin at sa buong pamilya natin. Sa lahat ng pagkakataon na ako’y nanghihina, ikaw ang lakas at sandalan ko.”
Idinagdag niya na si Julia ay kanyang partner, best friend, love, at boss, at isang malaking biyaya sa kanyang buhay. “Ikaw ang inspirasyon ko sa araw-araw. Napakapalad ko dahil ibinigay ka sa akin ng Diyos. Mahal na mahal kita!” dagdag niya.
Bago ang mismong kaarawan, binigyan na rin ni Coco si Julia ng maagang sorpresa.
Matagal nang pribado ang relasyon ng dalawa, at may mga haka-haka na sila ay may mga anak na, lalo na matapos ang tila pagbanggit ng TV host na si Willie Revillame noong 2024 tungkol sa mga “children” ng magkasintahan.
Hanggang ngayon, hindi pa nila ito opisyal na binibigyang linaw.
Samantala, magkakatrabaho ang dalawa sa paparating na TV series na “Sigabo.”
