Caretaker ng alkalde sa South Cotabato, huli dahil sa pagnanakaw ng pera

KORONADAL CITY – Arestado ang isang caretaker ng alklade ng bayan ng Banga, South Cotabato matapos itong nahuling nagnanakaw.

Sa panayam ng Bombo Radyo Koronadal, kinilala ni Banga PNP chief of police Maj. Joseph Forro III ang suspek na si Gelmar Ynalagan, 27-anyos.

Ayon kay Major Forro, binuksan ni Ynalagan ang sasakyan ni Mayor Albert Palencia at kukunin sana ang perang nagkakahalaga ng P200,000 ngunit nakita ito ng security guard.

Kaagad naman itong nirespondehan ng Banga PNP at inaresto ng pulisya ang suspek.

Inamin naman ni Ynalagan na dahil sa sugal ay natukso itong nakawin ang pera.

Sa ngayon ay nakakulong na ito sa lockup cell ng Banga PNP habang isinampa ang kasong robbery.