Inaprubahan na ng makapangyarihang Commission on Appointments (CA) nitong Miyerkules ang ad interim appointment ni Vince Dizon bilang Kalihim ng Department of Transportation (DOTr).
Inirekomenda ni Cavite 2nd District Rep. Lani Mercado ang kumpirmasyon ni Dizon.
Sa deliberasyon, tinanong si Dizon tungkol sa kanyang mga plano para mapabuti ang kalagayan ng transportasyon sa bansa, kabilang ang matagal nang problema sa matinding trapiko sa mga pangunahing kalsada sa Metro Manila.
Itinalaga ni Pangulong Ferdinand Marcos Jr. si Dizon bilang kalihim ng Department of Transportation noong Pebrero 21, kasunod ng pagbibitiw ni Bautista dahil sa umano’y isyu sa kalusugan.
Dati nang nagsilbi si Dizon bilang Presidential Adviser on Flagship Programs and Projects at namuno sa Bases Conversion and Development Authority (BCDA), at bilang “testing czar” at deputy chief implementer ng National Task Force Against COVID-19 sa ilalim ng administrasyon ni dating Pangulong Rodrigo Duterte.
Samantala, Inaprubahan din ng CA ang ad interim appointment nina Luis Pangulayan at Douglas Mallillin bilang mga komisyoner ng Civil Service Commission (CSC) at Commission on Audit (COA).
Papalitan ni Pangulayan si Commissioner Aileen Lourdes Lizada sa CSC at manunungkulan siya hanggang Pebrero 2032.
Samantala, si Mallillin ay manunungkulan rin bilang komisyoner ng COA hanggang 2032, kapalit ni Commissioner Roland Pondoc.
