Iniutos ng Senate Impeachment Court ang pagpapalabas ng subpoena laban sa dalawang opisyal ng National Bureau of Investigation (NBI) upang tumestigo sa paglilitis kaugnay ng Article IV ng impeachment case laban kay Vice President Sara Duterte.
Pinayagan ni Presiding Officer Sen. Francis “Chiz” Escudero ang kahilingan ng prosekusyon na ipatawag sina NBI Regional Director Atty. Jeremy Lotoc at Senior Agent John Mark Calilung bilang mga testigo.
Ayon kay House Prosecution Spokesperson, Robert Ace Barbers mahalaga ang testimonya ng dalawang opisyal upang patunayan ang mga alegasyon sa ilalim ng Article IV ng Articles of Impeachment at upang kilalanin at patotohanan ang iba pang ebidensyang ihaharap sa impeachment court.
Bago aprubahan ang kahilingan, binigyan muna ni Escudero ng pagkakataon ang depensa na maghain ng pagtutol.
Gayunman, pinaboran ng impeachment court ang mosyon at iniutos ang pagpapalabas ng subpoena ad testificandum at duces tecum laban sa dalawang opisyal ng NBI.
Sa kautusan ng korte, inaasahang tatawagin ang dalawang opisyal bilang mga testigo habang sinisimulan ng prosekusyon ang pagtalakay sa Article IV ng impeachment complaint.
