Nanawagan si Pope Leo XIV na tapusin na ang mga digmaan sa buong mundo habang binabati ang libu-libong tao mula sa balkonahe ng St. Peter’s Basilica sa Vatican.
Ang naturang pahayag ay matapos ang kanyang pangalawang pampublikong paglabas bilang pinuno ng Simbahang Katolika.
‘In today’s dramatic scenario of a third world war in tatters, as repeatedly stated by Pope Francis, I also address the powerful of the world, repeating the ever-timely appeal: No more war!,’ pahayag ng Santo Papa.
Tinukoy ni Pope Leo ang ika-80 anibersaryo ng pagtatapos ng ikalawang digmaang pandaigdig.
Nanawagan din siya ng tunay at makatarungang kapayapaan sa Ukraine at isang tigil-putukan sa giyera sa pagitan ng Israel at Hamas sa Gaza Strip.
Samantala, libu-libo ang dumalo sa kanyang paglabas, kabilang si Alejandrina Espinosa, isang Peruana mula sa katutubong Quechua, na nagsabing naantig siya nang malaman na ang bagong Papa ay dating misyonero sa kanilang bansa.
Si Leo XIV, ipinanganak bilang Robert Francis Prevost sa Chicago, ay nahalal bilang ika-267 na Santo Papa noong Huwebes, at inaasahang magsisilbing tagapagbuklod ng Simbahan at tagapaghatid ng pag-asa sa panahon ng pandaigdigang krisis.
