Pinakilos ng pamahalaan ang pinakamalaking puwersa ng 10,000 TUPAD workers para isagawa ang Expanded Bayanihan sa Estero Program simula July 1, 2026.
Layon nito para mabawasan ang pagbaha sa mga komunidad at pangunahing lansangan sa Metro Manila.
Ayon kay Executive Secretary Ralph Recto, ang mas pinaigting na operasyon ay alinsunod sa utos ni Pangulong Ferdinand Marcos Jr. na palakasin ang mga hakbang upang maprotektahan ang mga komunidad na madalas naaapektuhan ng malalakas na ulan at pagbaha.
Sa pangunguna ng Metropolitan Manila Development Authority (MMDA) katuwang ang Department of Labor and Employment (DOLE), ang mga benepisyaryo ng Tulong Panghanapbuhay sa Ating Disadvantaged/Displaced Workers (TUPAD) ang magsasagawa ng paglilinis, pagtanggal ng putik at basura, at regular na pagmamantina ng mga pangunahing estero at kanal sa Metro Manila simula ngayong buwan.
“Alam natin ang hirap na dinaranas ng ating mga kababayan tuwing bumubuhos ang malakas na ulan. Kaya pinalawak natin ang programang ito para mas mabilis nating maalis ang bara sa mga estero at daluyan ng tubig at mabawasan ang pagbaha. Continuous ito ngayong taon,” ayon kay Executive Secretary Ralph G. Recto.
Sinimulan ang pinalawak na programa matapos pangunahan ni Recto ang pagpupulong kasama ang Department of Transportation (DOTr), Department of Public Works and Highways (DPWH), MMDA, at DOLE upang pabilisin ang paghahanda ng pamahalaan para sa tag-ulan at pagtibayin ang sama-samang pagkilos ng iba’t ibang ahensya laban sa pagbaha sa Metro Manila.
“Habang isinusulong natin ang mga pangmatagalang solusyon, ito ang agarang hakbang na makatutulong sa ating mga komunidad,” dagdag pa ni ES Recto.
