Nagtipon ang mga multisectoral group at kabataan sa Colon Street ngayong Nobyembre 30 upang ipahayag ang kanilang panawagan na magbitiw sa puwesto sina Pangulong Ferdinand Marcos Jr. at VP Sara Duterte.
Sentro ng rally ang umano’y lumalalang korapsyon at krisis sa bansa, na anila’y hindi natutugunan ng kasalukuyang pamahalaan.
Bilang simbolo ng kanilang hinaing, naglatag ang mga raliyista ng dalawang effigy: isa kay Marcos Jr. na nakabalot sa watawat ng Estados Unidos at tinaguriang “Kadiliman,” at isa kay Duterte na nakabalot sa watawat ng China na may markang “Kasamaan.”
Sa eksklusibong panayam ng Star FM Cebu kay Kei, chairperson ng Anakbayan–Cebu, binigyang-diin niya ang mahalagang papel ng kabataan at iba pang sektor sa pagsusulong ng mga panawagang panlipunan.
Ayon sa kanya, layunin ng kilos-protesta na magpasiklab ng mas malawak na kilusang masa at magpataas ng kamalayan ng publiko sa mga isyu tulad ng dagdag-sahod, tunay na repormang agraryo, at pagsugpo sa korapsyon.
Bagama’t hindi nila inaasahang magkakaroon agad ng pagbabago matapos ang rally, umaasa ang grupo na magsisilbi itong mitsa ng mas malawak na kilusang bayan.
Sa pagtitipon, ipinanawagan din ng grupo ang pagbuo ng isang people’s coalition government na umano’y hindi nakasandig sa mga political dynasty at tradisyunal na lider, kundi binubuo ng mga kinatawan mula sa mga magsasaka, manggagawa, kabataan, at iba pang marginalized na sektor.
