Naglunsad ang gobyerno ng Pilipinas, sa pamamagitan ng Department of Foreign Affairs ng microsite na magsisilbing mapagkukunan para sa opisyal na impormasyon at posisyon ng bansa sa 2016 Arbitration Award.
Sinabi ng DFA na ang website ay bahagyang katuparan ng pangako nitong isulong ang mas mahusay na pag-unawa sa desisyon bilang kontribusyon ng Pilipinas sa mapayapang pag-aayos ng mga hindi pagkakaunawaan sa pamamagitan ng international law.
Sa isang pahayag, sinabi ni Foreign Affairs Secretary Enrique Manalo na ang desisyon ay isang malaking kontribusyon sa international law at ang interpretasyon at aplikasyon ng UN Convention on the Law of the Sea (UNCLOS).
Noong nakaraang taon, muling pinagtibay ni Manalo na ang 2016 award ay nagsisilbing isa sa “twin anchor” ng patakaran at aksyon ng Maynila sa West Philippine Sea.
Ang microsite, na pinamamahalaan ng DFA Foreign Service Institute, ay magbibigay ng mga link, kabilang ang materyal na isinumite sa Tribunal at ginawang available ng Permanent Court of Arbitration, isang koleksyon ng mga pahayag ng DFA sa West Ph Sea Arbitration.
Magtatampok din ang naturang site ng isang pagpapaliwanag sa legal at geographic scope ng pinag-aagawang karagatan na West Philippine Sea.
