Ikinagalak ng mga miyembro mula sa ‘health sector’ ang pag-apruba ng House Committee on Health sa House Bill No. 9127, na inakda ni KABAYAN Partylist Representative Ron P. Salo, na pinapalawak ang benepisyong natatanggap ng mga ‘public health workers’.
Ayon kay Rep. Salo malaking tungkulin at halaga ng ‘public health workers’ sa ating bansa lalo na noong kasagsagan ng pandemya.
Ito ang mga doktor, nars, ‘midwife’, ‘medtech’ at mga ‘aide’ na nagtatrabaho sa mga pampublikong ospital, ‘health centers’ at ‘rural health units’ o RHU.
Dahil dito isinusulong ni Salo na dagdagan ang mga benepisyong nakasaad sa Republic Act No. 7305 o Magna Carta of Public Health Workers na mahigit tatlong dekada na mula nu’ng naisabatas ito.
Kabilang sa mga inihain na dagdag benepisyo para sa ‘public health workers’ ay ang pagbibigay ng 25% hazard allowance sa lahat na hindi alintana sa kanilang natatanggap na sweldo.
Kasama dito ang pagtaas ng ‘allowance’ sa P500.00 mula sa dating P300.00 na ibinibigay.
Dadagdagan din ang kanilang ‘laundry allowance’ sa P1,000 kada buwan mula sa P125.
Nakakuha ng suporta mula sa pribado at pampublikong sektor ang panukalang batas kabilang ang ‘Department of Health’ (DOH), ‘National DOH Employees Association’ (NADEA), ‘Department of Labor and Employment’ (DOLE), ‘Civil Service Commission’ (CSC), ‘Professional Regulation Commission’ (PRC), ‘Public Services Labor Independent Confederation’ (PSLINK), ‘Philippine Medical Association’ (PMA), ‘Philippine Hospital Association’ (PHA), ‘Philippine Association of Medical Technologists, Inc.’ (PAMET), ‘Philippine Dental Association’ (PDA), ‘Medical Action Group (MAG), at ang ‘Alliance of Health Workers’ (AHW).
Bilang ‘Chairperson’ ng ‘Committee on Overseas Filipino Workers’, naisip ni Salo na ang dagdag benepisyo para sa ‘public health workers’ ay maaaring sagot sa ‘brain drain’ o ang paglisan ng mga ‘health workers’ mula sa Pilipinas para magtrabaho sa ibang bansa na nagiging sanhi sa kakulangan ng mga ‘medical professionals’ sa bansa.
