Hinikayat ni Senate Minority Leader Alan Peter Cayetano ang mga Pilipino na patuloy na piliin ang tama sa kabila ng mga pagsubok, kasabay ng panawagang simulan sa sarili ang disiplina at pananagutan sa halip na umasa lamang sa mahigpit na pagpapatupad ng batas ng pamahalaan.
Sa isang pahayag, sinabi ni Cayetano na araw-araw ay nahaharap ang bawat tao sa mga pagpapasyang maaaring makaapekto sa kanilang buhay, kaya mahalagang sikaping gawin ang tama sa bawat pagkakataon.
Binigyang-diin ng senador na bagama’t mahalaga ang mahigpit na pamamahala ng gobyerno, mas makabuluhan kung ang bawat mamamayan mismo ay may disiplina at kakayahang pamahalaan ang sariling kilos.
Binanggit din ni Cayetano na mas agarang suliranin para sa maraming ordinaryong Pilipino ang katiwalian at ang paghahanap ng sapat na panggastos para sa pamilya, kumpara sa mga usaping pampulitika gaya ng impeachment trial.
Sa kabila ng mga hamong ito, hinikayat niya ang mga nakararanas ng paghihirap na huwag mawalan ng pag-asa o hayaang tukuyin ng kanilang kasalukuyang kalagayan ang kanilang pagkatao at layunin sa buhay.
Dagdag pa ng senador, mahalagang talikuran ang mga paniniwalang nagpapahina ng loob, kumapit sa pananampalataya, at patuloy na magsikap na gawin ang tama sa araw-araw.
