BAGUIO CITY – Ipinasuspinde ng Office of the Ombudsman ang alkalde at ilang opisyal ng Bangued, Abra matapos makahanap ng basehan para kasuhan ng grave misconduct at conduct prejudicial to the best interest of service sa Sandiganbayan.
Batay sa desisyon ng anti-graft body, aabot sa halos P1.11-milyon ang natanggap ng kompanyang pag-aari umano ni Mayor Dominic Valera mula sa lokal na pamahalaan para sa isang proyekto.
Minadali umano ng alkalde ang paggawad ng P1.17-milyong kontrata sa Abra Patreon at halos P100,000 sa hiwalay pang DMJS Tarpaulin Printing Shop.
Bukod sa suspensyon, pinatawan din si Valera ng perpetual disqualification mula sa paghawak ng pampublikong opisina, cancellation of eligibility, forfeiture of retirement benefits at ban mula sa civil service examination.
Dawit din sa kaso at parusa sina acting municipal accountant Henry Bodaño, acting treasurer Romie Turqueza at budget officer Amelia Bersamira.
Habang isang taong suspensyon naman ang ipinataw sa asawa ni Valera na si Vice Mayor Mila Valera.
Batay sa imbestigasyon ni Ombudsman investigators, nakapangalan sa magasawa ang gasolinahan habang sa anak at manugang naman ang printing shop.
Sa ngayon ibinaba na ni Ombudsman Samuel Martires sa Department of the Interior and Local Government at Department of Finance ang suspension order.
Tikom naman ang kampo ng mag-asawang opisyal sa issue.
