Kinumpirma ng Department of Foreign Affairs (DFA) na ligtas ang 63 Pilipino habang isa ang napaulat na nasugatan at isa ang nawawala mula sa mapaminsalang sunog na sumiklab sa Wang Fuk Court apartment complex sa Tai Po district, Hong Kong.
Sa isang statement, iniulat ng Consulate General ng Pilipinas sa Hong Kong na nagpapatuloy ang kanilang on-the-ground operations para matunton at matulungan ang mga Pilipinong apektado ng naturang insidente.
Base naman sa Consulate General mobile teams, walang natamong injury at walang banta sa buhay ang mga survivor na Pilipino na na-displace din dahil sa sunog.
Ang isa namang nasugatan ay nangailangan ng medical assistance at ang isang nawawala ay hindi pa rin makontak.
Ayon kay DFA spokespersnon Angelica Escalona, mayroong mga nakarehistro at nakalista na residente at nagtratrabaho sa Wang Fuk Court subalit hindi napaulat na nawawala mula sa employer kayat kanilang inaalam pa kung ang mga ito ay wala sa mismong site nang sumiklab ang sunog.
Sinabi din ng DFA na kasalukuyang biniberipika na ng Consulate General ang estado at kinaroroonan ng 91 Pilipino na nakarehistro sa Wang Fuk Court.
Ito ay dahil may ilang manggagawa ang posibleng nagpalit ng employer at lumipat sa ibang lugar o bumalik sa Pilipinas bago pa man mangyari ang sunog.
Sa ngayon, pumalo na sa 128 katao ang nasawi sa sunog habang daan-daang indibidwal pa rin ang nawawala.
