VIGAN CITY – Naisayangkat ti search warrant operation ken ni Jonar Sajonia Quileza, agtawen iti limapulo ket maysa, naasawaan, agnaed idiay Barangay Bonifacio ngem temporaryo nga agnanaed idiay Brgy. Dardarat, Cabugao gapu ti panaglabsingna iti RA 9165 ken RA 10591.
Iti pannakipapatang ti Bombo Radyo Vigan ken ni PMaj. Juan Jhay-ar Maggay a hepe iti Cabugao Municipal Police Station, sakbay ti search warrant ket addan dagiti naawatda a report a nainaig iti ilegal a droga ti suspek ket nu mabartek iruarna iti paltogna a pangbubutengna isu a namonitor ket idi nakumpirmaran iti maikaniwas nga aramidna, isun iti panangisayangkatda iti search warrant.
Segun ken ni Maggay, ti search warrant ket naisayangkat iti maysa a piggery idiay Dardarat, Cabugao ket ginandat pay laeng a lumaban ti suspek ngem binagaanda a saanen a lumaban ket sumuko laengen, a banag a sinurotna met.
Naala manipod ti suspek iti maysa a cal.45 M1911, dua a magazine para iti cal .45, duapulo ket innem a live ammunition para iti cal.45, duapulo nga empty shells para iti cal .45 ken sangapulo ket dua a sachet iti small heat-sealed plastic a naglaon ti mapapati a shabu.
TI PANAGSARITA NI PMAJ. JUAN JHAY-AR MAGGAY
