VIGAN CITY – Malukatanen tatta nga aldaw ti Quirino Stadium Track Oval para kadagiti sumagmamano a sporting events ken kadagiti mangayat a mapan agjogging kas pinasingkedan ni Provincial Sports Chief Marius Cabudol.

Iti pannaki-uman ti Bombo Radyo ken ni Cabudol, inaprubaranen ni Gov. Ryan Singson dagiti pagannurotan a binukelda kadua ni Dr. Trina Talaga ngem no man adda iti nasaysayaat a singasing para iti nasao a banag ket kiddawenda a maipakaammo kadakuada.

-- Advertising --

Sangapulo a metro iti kaadayo dagiti mapan tapno maliklikan iti COVID19 ta dagiti maaramat ket ti laeng lane 1 ken 4 para kadagiti mapan ag-walking; lane 6 ken 8 para kadagiti mapan ag-jogging isu a ti lane 2, 3, 5 ken 7 ket saan a maaramat. 

Inlawlawag ti opisial nga iti oras ti alas singko agingga iti alas otso laeng ti panaglukat ti stadium para iti agsapa ken manipud idi alas kuatro iti malem agingga alas siete iti rabii a dagiti mapan ket maidalan iti thermal scanning ken mailista ti naganda.

Kabayatanna, mapagpapatanganto pay laeng no kaano iti pannakaisubli dagiti dadduma a sporting events ta dagiti inaprubaran pay laeng ti PSC ken ti Inter Agency Task Force ti insublida.