VIGAN CITY – Al-allukoyen ti singer a ni Bituin Escalante dagiti agtutubo iti agdama nga ad-adda a suportaran da dagiti Original Pilipino Music (OPM) ngem kadagiti uso tatta  a foreign music nangruna dagiti K-POP.

Ti pannaki-uman ti Bombo Radyo Vigan ken ni Escalante a maysa kadagiti nagserbi a judge ti kalkalpas a 3rd National Bombo Music Festival, napintas dagiti foreign music ngem napinpintas dagiti OPM music iti agdama isu a rumbeng na laeng nga isu iti masuportaran ken maitandudo ditoy pagilian ken  uray iti intero a lubong.

-- Advertising --

Ingunam-gunam na a babaen kadagiti OPM songs ket ad-adda a maipadanun kadagiti agdengdengngeg dagiti mensahe a kayat nga ipadanun kadakuada dagiti singers wennu artists.

Kagiddan iti dayta ket dinayaw na ti Bombo Music Festival agsipud ta babaen iti nasao nga aktibidad nga idadaulwan ti Bombo Radyo Philippines ket maipakita iti intero a lubong iti laing ken talento dagiti Pilipino iti panagsurat ti kanta ken panagkanta.

Maipalagip a ti nagkampeon iti maikatlo a BMF iti naisayangkat a Grand Performance Night idi January 11 idiay West Visayas State University Cultural Center ket ti “Vows” a kinanta da Dave kenni Jhanniel Alvarado.