-- ADVERTISEMENT --

VIGAN CITY – Maysa a tama ti bala iti akin-kannawan a pingping ti sinagrap ni Mario Michael Rosabia, agtawen iti uppat a pulo, negosyante a taga-Lussoc, Sto. Domingo gapu ti pannakapaltogna iti sangwanan ti Regional Trial Court iti Burgos Street, Brgy. 3, Vigan City.

Iti pakauna nga imbestigasyon dagiti pannakabagi ti linteg, kalkalpas ti hearing iti kasona ti biktima ta isu ket nainaig iti iligal a droga idin ta bimmaba iti agdan ti RTC ket adda ti nakamotorsiklo a nangpaltog kenkuana a daytoy ket nakugtaran pay laeng ti biktima sakbay a nakalibas.

Maipalagip nga idi April 19 ket naipakatan iti search warrant ti biktima ket naalaan iti walo a piraso ti heat sealed transparent sachet ken tallo a gramo ti shabu nga aggatad iti PHP24,500 ngem nupay kasta ket nakapyansa.

Natalgeden ti kasasaad ti biktima nga ita ket maob-obserbaran iti balay pagagasan.

Im-imbestigaranen dagiti pannakabagi ti linteg no siasino ti suspek ken no ania ti motibo ti krimen.  

-- ADVERTISEMENT --