VIGAN CITY – Mangrugi inton Lunes (August 2) ket kasapulanen iti negative result ti RT-PCR ket saan a maawat dagiti antigen test result kadagiti sumrek ditoy probinsia tapno malapdan ti panagwaras dagiti variants ti Covid19.

Segun ken ni Gov. Singson, adda ti sangapulo ket tallo nga aktibo a kaso ti Alpha variant ken walo iti Beta variant ngem agingga iti agdama ket awan pay ti kaso ti Delta variant isu a saanen a masapul nga aguray pay nga umadu ti kaso sakbay a maingetan dagiti restriksyon.

-- Advertising --

Inyarigna ti nakaro a sitwasyon ti Covid19 idiay Ilocos Norte a nakapunpunwan dagiti health facility isu a masapul ti naing-inget a restriksyon agsipud ta uray awan pay ti Delta ditoy probinsia ket napumpunnon met dagiti health facility.

Gapu ti dayta, kiniddaw ti gobernador ti pannakitinnulong dagiti umili agingga a maisublinton ti normal ti kasasaad ti probinsia.