-- ADVERTISEMENT --

VIGAN CITY – Mapatta-patta a nasurok kumurang P100,000 ti gatad iti nauram a pagtaengan idiay Brgy. VII, Vigan City.

Iti pannaki-uman ti Bombo Radyo Vigan ken ni Fire Senior Inspector Rex Dela Cruz, inisyal pay laeng ti nasao a gatad iti nauram a sanikua ta kasaritadanto pay laeng iti naapektaran a pamilia Ramos.

Segun ken ni Dela Cruz, saanda pay laeng a maibaga nu ania iti rason ti uram ngem patienda a nagtaud iti appliances iti nasao a pagtaengan ta isu iti nakakaroan a nauram a paset.

Nupay kasta ket awan ti nadangran ti napasamak nga uram ta nairuarda ti baket nga adda iti uneg sakbay a pimmigsa iti uram ket nagpaut ti agingga lima a minutos ti uram ta nasebseb nga insigida.

Immunan nga adda naawatda a report a nauram a poste iti nasao a lugar ket naisaruno a naipakaammo a maur-uram iti pagtaengan ti pamilia Ramos isu a naipatulod iti tallo a firetruck tapno agresponde.

-- ADVERTISEMENT --

Inyunay-unayna kadagiti agindeg iti siudad ti Vigan a sakbay iti papanawda dagiti pagtaenganda ket siguradoenda a naikkatda iti saksakan dagiti appliances wenno naibaba ti main breaker, isarra iti gasul, saan a pagay-ayamen ti posporo dagiti ubbing tapno maliklikan ti uram.