VIGAN CITY – Dua a set iti baraha ken siyam a pulo ket tallo a pisos a pusta iti naala dagiti otoridad kadagiti nagtotong-it idiay Barangay San Juan, Candon City.

Dagiti nakemmeg ket isu da Delia Cabe Apelado nga agtawen ti innem a pulo ket lima, naasawaan; Renato Ramos nga agtawen ti dua pulo ket maysa, baro; Rowena Ramos nga agtawen ti tallo pulo ket siam, naasawaan; Leticia Dominguez Madarang nga agtawen ti lima pulo ket lima, naasawaan; Daisy Ramos, agtawen ti dua pulo ket uppat, balasang kenni Mildred Ramos nga agtawen ti lima pulo ket siam, naasawaan, awanan trabaho nga agpapada nga agnaed idiay Barangay San Juan, Candon City.

-- Advertising --

Agsipud iti dayta, sumango ti kaso a panaglabsing ti Presidential Decree 1602 dagiti  nakemmeg a nagsusugal.

Itay kallabes, inpalagip ni OIC- Provincial Director Police Colonel Ysmael Yu iti bilin ti PNP national headquarters a masapul a maisardeng dagiti amin a klase iti panagsugal kadagiti naduma-duma a paset iti pagilian.