VIGAN CITY – Natay gapu ti panagbekkelna ti maysa a menor de edad nga agtawen iti sangapulo ket innem, grade 10 student ti Ilocos Sur National High School ken residente ti Brgy. Ayusan Norte, Vigan City.

Napakaammoan ti Vigan City Police Station nga adda ti panagpakamatay a napasamak iti nasao a barangay isu nga insigida a nagrespondeda.

Segun ti lolo ti biktima a ni Lorenzo Espiritu, agtawen iti limapulo ket pito, idi nakariing ket nadlawna a ti biktima ket nakabitin iti railings ti agdan iti family house da babaen ti barikes a naiputipot iti tengngedna.

Pinasingkedan met ti ina ti biktima a ni Antonette Pacano nga iti ala una y media tattay parbangon ket nakitana ti biktima iti taw ti uneg ti kuartona a gandatenna koma ti tumupwak ngem linapdanna.

Agtultuloy ti panangduktal dagiti pannakabagi ti linteg no ania ti rason ti panagbekkel ti biktima.

-- Advertisement --