VIGAN CITY – Nasurok kumurang a sangapulo ket pito a ribo a pisos ti gatad a mapapati a natakaw iti maysa a store a kukua ni Anna Marie Ballara, agtawen iti uppat a pulo idiay Brgy. Cabittaogan, Sta. Catalina.

Impakaammo ti biktima kadagiti pannakabagi ti linteg iti Sta. Catalina Police Station nga insigida a rinespondeanda.

Segun ken ni P/Lt. Ferdinand Rabago, alas nuebe iti rabii ti July 25 idi pinanawan a nakakandado ken nakarikep ti tiendana ket idi alas kuatron iti parbangon ti July 26, impakaammo ni Pat. Randy Rafanana iti kasinsinna a biktima a nakalukaten ti tienda.

Gapu ti dayta, sinubli ti biktima ti tiendana ket naduktalanna a mapukpukaw ti kuarta ken ti lakona a sigarilyo.

Mapapati a ti suspek ket nagna iti tawa ti store ket tinakawna ti nasurok kumurang walo a ribo a pisos a barya ken walo a ream ti sigarilyo nga aggatad iti PHP8,240.

-- Advertisement --