VIGAN CITY – Masapsapul ti maysa a senior citizen ta mapapati a nalmes itattay iti irigasyon idiay Cacadiran, Cabugao.

Iti pannaki-uman ti Bombo Radyo Vigan ken ni LDRRMO Officer Nereo Daprosa, adda ti naawatda a report ti mapapati a pannakalmes ni Natividad Sunio, agtawen ti walopulo isu a nagrespondeda ket inaramiddan amin a kabaelanda tapno masapul ngem saanda a nasarakan.

Segun ken ni Daprosa, ti biktima ket saan unay a makakitan ken adda payen ti panagliplipatna a posible a rason iti pannakadanonna iti irigasyon.

Alas dos pay laeng idi mapapati a mapukpukaw ni Sunio ta sakbay iti pasamak ket adda pay laeng isuna iti batog ti pagtaengan ti kapitan ti nasao a barangay.

Nupay kasta ket maituloy iti panagsapul dagiti pannakabagi ti linteg ken ni Sunio inton bigat (August 3, 2021) tapno masarakanen ti biktima.

-- Advertisement --