VIGAN CITY – Kaso a Grave Threat nga adda pakainaiganna iti Republic Act 10591 wenno Comprehensive Firearms and Ammunition Act ti sangwen ti maysa a lalaki a nangpangta iti waiter ken natiliwan iti paltog idiay Brgy. Poblacion, San Vicente.

Nakemmeg ti suspek a ni Mc Lester Martinez, agtawen iti tallopulo ket dua a taga-Ayusan Sur, Vigan City idinto a ti biktima ket ni Reynold Supnet, agtawen iti duapulo ket uppat, head waiter ti Option Club a taga-Bayubay Sur, San Vicente.

-- Advertising --

Agin-inom ti suspek kadua ti maysa nga engineer idin ta pinangtaanna ti biktima a kitaenna a naimbag ti or-orderen dagiti kustomer no saanna kayat ti mapaltugan.

Nagkiddaw ti pammakawan ti biktima ken nagpatulong kadagiti supervisor-na pakairamanan dagiti pannakabagi ti linteg ket inamin ti duty bouncer a ni John Paul Azcueta a nangipalladaw ti suspek iti pitaka naglaon iti mapapati a caliber 380 Taurus Pistol a namarkaan iti Pt738 nga insukona iti nagresponde a pulis.

Addan iti kustodia dagiti pannakabagi ti linteg ti suspek tapno dumalan iti husto a proseso.