VIGAN CITY – Maisagsaganan ti kaso a theft kontra ti maysa a lalaki a nagtakaw iti uppat a kalding iti agduduma nga aldaw idiay Barangay Bungro, Magsingal.
Nabigbig ti suspek a ni Clifford Ibea Doniego, agtawen ti duapulo, addaan ti live-in partner, construction worker idinto a dagiti biktima na ket da Arthur Ugerio Villahermosa, agtawen ti pitopulo ket pito, naasawaan, mannalon; Mauro Ceria Utrera, agtawen ti limapulo ket tallo, naasawaan, mannalon; ken Adriano Ugerio Villahermosa, agtawen ti limapulo ket walo, naasawaan, mannalon nga agpapada nga agnaed idiay Brgy. Bungro, Magsingal.
Iti pannaki-uman ti Bombo Radyo Vigan ken ni PCapt. Rodel Ragasa iti Magsingal Municipal Police Station, impakaammo dagiti biktima iti natakaw a kaldingda ket iti panagsalsaludsodda, naamoan a nakapastor dagita idiay Barangay Cabaroan kangrunaan iti pagtaengan ni Elmar Pascua Guiang ngem inlawlawagna a saan nga isu ti nangtakaw ta ginatangna laeng ken ni Clifford Doniego.
Immuna a nailako idi Enero 29, 2023 ti brown a kalding iti gatad a P3,600; simmaruno idi February 1, 2023 iti nangisit a kalding iti gatad a P2,300; ken February 3, 2023 ti babai a kalding nga aggatad iti P3,100 ken sabali pay a babai a kalding nga aggatad iti P2,800.
Apaman a naamoan ni Guiang a takaw dagiti nagatangna ket insublina kadagiti akin-kukua ken nakasagana nga agsarita inaig iti napaspasamak.
Segun pay ti PNP, inrason ti suspek ken ni Guiang nga impalako laeng ti kabsatna dagiti kalding ta agkasapulanda iti kuarta ngem iti palawagna kadagiti otoridad ket kinunana nga arametenna ti paglakoanna a paggatang ti agas ti masakit nga anakna.
TI PANAGSARITA NI PCAPT. RODEL RAGASA
