VIGAN CITY – PHP53,000 a gatad ti alahas, PHP7,3OO a kuarta ken cellphone nga aggatad iti PHP1,500 ti mapapati a tinakaw dagiti saan pay a nabigbig a suspek iti pagtaengan ni ni Gringo Starr Boquing, agtawen iti tallopulo ket lima, mannalon a taga- Brgy. Camanggaan, Sta. Cruz.

Segun ti biktima, nakariing pay laeng iti alas dos y media iti parbangon ngem natakuatanna laengen ti pasamak iti alas syete iti bigat.
Ti tawa iti maikadua a kadsaaran ti balayna ti mapapati a simrekan dagiti nagtakaw idinto a ti mapapati a rimuaranda ket iti akin-igid nga arwangan iti umuna a kadsaaran ti balayna.

-- Advertising --

Kabayatanna, duapulo a ribo a pisos met ti mapapati a natakaw iti pagtaengan ni Jojo Bal-ut, agtawen iti tallopulo ket walo, seafarer a taga- Brgy. Coscosnong, Sta. Cruz.

Iti pakauna nga imbestigasyon, alas otso iti agsapa idi naduktalan ti biktima a ti dua a bag-na a naglaon iti wallet nga ayan ti kuarta ket mapukpukaw.

Mapapati a ti nakalukat a tawa iti amianan a paset iti umuna a kadsaaran ti balayda ti simrekan dagiti suspek babaen ti panagaramatda iti tugaw idinto a ti arwangan iti kusina met ti rimuaranda.

Dagiti bag ken wallet ket nasarakan a nakaiwara iti pagipupukan iti manok iti laud a paset ti paraanganda.