VIGAN CITY – Dua iti natay ken dua iti nadundunor iti napasamak a pannagbat ken pammagkong idiay Brgy. Catucdaan, Cabugao.

Nabigbig dagiti pimmusay a da Demetrio Sevilleja ken Michael Sevilleja agtawen ti dua pulo ket tallo ken nadundunor da Didi Sevilleja agtawen ti uppat a pulo ket siyam kenni Melvin Sevilleja agtawen ti dua pulo ket uppat nga agpapada nga agnaed ti Sitio Ulayos iti nasao a barangay.

-- Advertising --

Iti pannaki-uman ti Bombo Radyo Vigan kenni Michelle Sevilleja, anak ken kabsat dagiti biktima, maturog da kuman ngem rimmuar ti amana a napan iti igid ti waig agingga a saanen a nagsubli ket sinaruno iti kabsatna a ni Michael.

Nakigtot da laengen ta nagriyaw iti kabsatna nga irikep da dagiti ridaw ta pinapatay ti suspek a ni Michael Gaspar iti amada.

Simmaruno a tinurong ni Gaspar ti pagtaengan dagiti biktima ket insarunona a tinagbat ti Michael ken dagiti dadduma pay a miyembro ti pamilyada.

Nakataray ni Michelle ken iti inana tapno agpaarayat kadagiti karruba da.

Insigida a naglibas ti suspek kalpasan iti krimen ket narekobre dagiti otoridad ti boneng ken kutsilyo a naaramat iti nasao a pasamak.