VIGAN CITY – Maisayangkat iti contact tracing ita nga aldaw kadagiti nakapulapol ken nakasarita ti maysa a Pilipino a naggapo idiay United Arab Emirates a nagpositibo iti B.1.1.7 SARS-COV-2 variant wenno UK variant kas pinasingkedan ni Presidente Rodrigo Duterte.

Segun ken ni Duterte, napateg a ma-contain iti nasao a variant tapno saanen nga agwaras pay isu a maisayangkat iti contact tracing.

-- Advertising --

Kiddawna a saan a nakarkarun no yarig iti covid-19 iti nairekord a variant tapno saan a marigatan dagiti eksperto iti panangpartuat iti bakuna.

Pinasingkedan ni Health Secretary Francisco Duque III a ti nasao a pasyente ket maysa a lalaki, agtawen ti duapulo ket siam nga agnaed idiay Kamuning, Quezon City.

Nagturong idiay Dubai ti lalaki idi December 27, 2020 kaduana ti nobyana para iti business purpose ket nagsubli iti pagilian idi January 7, 2021 a naglugan iti Emirates Flight No. EK332.

Nakitaripnong dagiti dua idi December 30 iti maysa a negosyante, bimmisita kadagiti mall ken nagturong kadagiti tourist site iti nasao a pagilian.

Idi nakaawidda ditoy pagilian ket dimmalanda iti swab test ken nagquarantine ket rimmuar iti resulta a nagpositibo iti covid-19 ti lalaki isu a nairefer iti quarantine facility idiay Quezon City ket naipatulod iti samples-na iti PGC para iti genome sequencing ket naamuan a positibo iti covid variant idinto a nagnegatibo ti nobyana.

Insigida a sinundo ti City Epidemiology and Surveillance Unit idiay Quezon City dagiti nagannak ti pasyente a lalaki a nakaudana iti pagtaenganda ket insigidada a na-isolate ken natest iti covid-19.