VIGAN CITY – Kiddaw ni Ilocos Sur Provincial Animal Quarantine Officer Martel Quitoriano iti pannakitinnulong iti amin nga umili kangrunaan kadagiti opisyal ti barangay tapno malapdan ti panagwaras ti African Swine Fever iti probinsia.

Segun ken ni Quitoriano, rumbeng laeng nga ipakita iti panangisakit kadagiti taraken a baboy babaen iti panangmonitor a nalaing kadagiti masakupanda.

Inlawlawagna a dagiti tattao met laeng iti rason nu apay nga agwaras ti sakit ti baboy gapu iti panangiyakarda uray ammoda nga infected-n.

Inyunay-unayna kadagiti agtartaraken ti baboy a saan a rumbeng a panunoten iti nalaka a presyo ti karne, nadaras ti proseso ken panangipadawat ta isagsagmakda laeng dagiti tarakenda ken ti pagsapulanda.

Inyunay-unayna iti panagbalin a naalibtak dagiti barangay tapno saanen nga agwaras pay iti ASF.

-- Advertisement --

Innayonna a nu adda iti aglabsing iti pagannurutan ti probinsia ket insigidada nga ipakaammo kadakuada tapno makapagtignayda.