VIGAN CITY – Impakaammo ni Sto Domingo election officer Elmer Labor nga addanto maited nga application form babaen kadagiti barangay captain para iti voter registration kalpasan a nauraman ti Comelec office iti nasao nga ili gapu ti electrical short circuit.

Iti pannaki-uman ti Bombo Radyo Vigan ken ni Labor, adu dagiti papelesda a napuoran  kas dagiti election records da iti tawen 2013, 2015, 2016, ken 2019 ngem mabalindanto latta nga agkiddaw iti back-up copy iti central office ti Comelec ta adda idi naipaspasada tunggal adda maangay nga election registration hearing.

-- Advertising --

Kabayatanna, dagiti met naisalbarda a papeles ket adda iti Sangguniang Bayan Session Hall nga isu ti manamnama a pagopisinaanda pay laeng bayat a maisimsimpa ti pagtalinaedandanto met laeng nga opisina.

Nasuspenso pay laeng met ti voters registration iti ili ti Sto.Domingo gapu ti pannakaisakupna iti Modified Enhanced Community Quarantine manipud idi June 5 agingga inton June 19.