VIGAN CITY – Maitabon iti uneg ti sangapulo ket dua nga oras dagiti tattao a natay nga adda kainaiganna iti covid-19 kas inlawlawag ni Dra. Trina Tabogga Talaga a chief of Hospital iti Ilocos Sur Provincial Gabriela Silang.

Segun ken ni Dra. Talaga iti programa Ryanniag, maibasar ti pagannurutan ti Department of Health ket dagiti maibilang a covid probable, suspected ken confirmed ket saanen a kasapulan pay a mabalsamar ta rumbeng a maitabon nga insigida iti uneg ti 12-hours wenno ma-cremate.

Imbingayna pay a prayoridad dagiti agindeg iti probinsia iti kakaisuna a crematorium iti Ilocos Sur manipod iti kabangibang a probinsia a kas iti Abra ken La Union.

Innayonna a numan bilang saanen a kabaelan iti crematorium ket adda pay iti sabali a pagpilian a rumbeng a maawatan dagiti umili kangrunaan ita nga umad-adu latta iti kaso ti covid-19 iti probinsia.