File photo. Ti Isuzu Dump Truck a nairaman iti aksidente idiay San Juan, Sta. Lucia. Ilocos Sur.

VIGAN CITY – Dead on arrival idiay Ilocos Sur District Hospital – Sta. Lucia, Ilocos Sur dagiti agassawa a nakalugan ti Nissan Van a dimmungpar ti maysa nga Isuzu Dump Truck idiay Barangay San Juan, Sta. Lucia, Ilocos Sur.

Binigbig ni Police Captain Leonilo Ancheta, hepe ti Sta. Lucia municipal police station dagiti pimmusay nga agassawa a da James Oliver Marzan, maysa nga Overseas Filipino Worker kenni Rho Anne Marzan, maysa a nurse agpada nga agtawen ti tallo pulo ket uppat nga agnaed idiay Poblacion West, Pidigan, Abra idinto a ti nadunor nga anak da ket ni Michael Alfred Marzan.

-- Advertising --
File photo. Langa ti Nissan Van a nagluganan dagiti natay nga agassawa.

Agpapa-amyanan a direksyon ni Geronimo Valdez Jr., nga agtawen ti lima pulo ket maysa a taga- Banagoilan West, Bangar, La Union ta mapan agideliver ti bato idiay Sta. Catalina idi mapapati nga inagaw ti Nissan Van nga agpa-abagatan a minaneho ni James iti linya na isu a napasamak iti aksidente.

Gapu ta napigsa iti impact iti panagdinnungpar dagiti dua a lugan, napitpit iti sangwanan ti van ket naipit dagiti agassawa a nakalugan ti driver’s seat ken passenger’s seat a nagsagabaan da iti dunor iti naduma-duma a paset iti bagi da a poon iti nakatayan da.

File photo. Langa ti driver’s seat ti Nissan Van a nagluganan dagiti natay nga agassawa.

Kabayatanna, ti driver ti truck ket saan a naan-ano ngem ti minaneho na a truck ket napittak ti windshield na ken adda iti nadadael iti sangwanan a paset ti lugan.

Ti agdama, agtaltalinaed idiay lock-up cell ti Sta. Lucia PNP ti nagmaneho ti truck ket maisagsagana iti kaso a posible a maipila kontra kenkuana.