VIGAN CITY – Sumango ti kaso a panaglabsing ti Republic Act 10591 dagiti agasawa a naalaan iti dua a paltog idiay Brgy. Banaoang, Bantay.

Segun ken ni PMaj. Juan Jhayar Maggay a hepe ti Bantay Municipal Police Station, agpapa-amianan a direksyon a nakalugan ti motorsiklo da Jerry Bajog, agtawen ti limapulo, awanan ti trabaho ken ni Layla Bajog, agtawen ti uppat a pulo ket uppat, housewife nga agpada nga agnaed idiay Brgy. Banaoang, Bantay nga adda iti ikotda a paltog.

-- Advertising --

Maibasar ti inisyal nga imbestigasyon, nakita da Pat. Dale Patrick Ubaldo ken Pat. Jeremiah Palpallatoc nga agpada a kameng ti 1st PMFC TMRU iti panagikotda iti maysa a homemade shotgun ken maysa a homemade Calibre 22 ket inkalintegan dagiti suspek a napidotda laeng dagiti iggemda ket planoda nga ipan iti kustodiya ti pannakabagi ti linteg.

Nupay kasta ket saanda a mamati iti kalinteganda ta patienda a modusda laeng dayta ta nasaysayaat koma nu impakammoda nga immuna kadagiti otoridad wenno iti barangay tapno dumalan iti husto a proseso dagiti nasao a paltog.